早前官媒啟動唔少機器，係咁出文砌長和主席李嘉誠，似乎有意將佢打成一個「衰人」，國家有難之時𡁻完鬆。但係一輪攻勢之後，大家唔知有冇發覺，早前輪到撐誠哥嘅人大反攻，由全國政協常委唐英年到各大商會，各自為誠哥抱不平，官媒近日亦沉寂冇再「攻誠」。唔少人奇怪，何以呢班商家佬咁大膽，膽敢同官媒對着幹？
唔係阿爺落柯打
情與義，值千金，有政商界中人話，呢壇撐超人大龍鳳，唔多唔少有義氣兩個字，好似唐唐咁，佢身為全國政協常委，甘冒被阿爺搣柴危機唱反調，吉士喺工商界算罕見，而當年梁振英當選特首後，超人不單唔似世界仔咁即刻轉軚，反而一直企硬，至今冇挺過梁，姑勿論係死心塌地撐唐唐抑或好憎CY所致，呢份堅持認真少見，又難怪唐唐肯幫口。至於其他商會尤其係潮州幫，若然同聲同氣都唔幫，話唔定俾人睇唔起。
當然，義字唔係重點，若然阿爺下令格殺勿論，相信情況唔係咁。有政商界中人同花生友講，官媒之前發文力批，其實唔係中央發號施令，據佢了解，內地有關部門確實係不滿誠哥撤資，皆因佢喺國際上好有影響力，名副其實係「風向標」，驚佢一走有骨牌效應，而且對誠哥唔聽中央意旨挺梁都心中有氣。但明查暗訪，似乎唔係阿爺㩒掣要砌，既然阿爺話冇落柯打，工商界梗係群起抵抗。他朝君體也相同，花生友相信佢哋呢鋪撐誠哥或者都係撐自己。
花生友
周二、四刊出