淡出商舖市場嘅舖王「波叔」鄧成波，繼續將資金拎去買工廈，剛以7,380萬元買貨，今次目標係樓齡超過40年嘅荃灣富華工業大廈。
波叔近年積極買工廈，主力搵單一業權物業，貪佢可以即刻搞活化。隨住活化工廈計劃明年結束，波叔就有新諗頭，開始睇樓齡好舊嘅工廈，儲埋等發展商出價收購。
波叔最新買入嘅工廈位於荃灣半山街10至16號富華工業大廈1樓A至B室，喺正屋苑荃德花園對面，全層面積有3.6萬方呎，連埋3個車位成交，買入價7,380萬元，呎價2,041元。
呢幢富華工業大廈，樓齡已經有42年，荃灣以前多紡織廠，呢層單位原本由香港中央紡織自用，當年約以160萬元買入，𠵱家沽出大賺7,213萬元。