呢屆立法會剩番一年任期，但工黨幾位議員卻冇hea住做，嚟緊至少會提4條私人條例草案，其中兩條由何秀蘭Cyd負責，包括時下熱話，就係將特首納入《防賄條例》規管範圍，並設立獨立委員會負責批核特首收受嘅利益，以糾正現行制度嘅根本缺陷。
阿Cyd話呀，梁振英上任時明明講過話會搞，就嚟落任都未有任何跟進，係時候都要同一男子埋單計數，相信呢條私人條例草案唔係涉及好多公共開支，亦唔太影響政治體制或政府運作，覺得梁振英應該畀佢提出。
佢同時炮製緊另一條私人條例草案，係關於防範國教重演，並預告黨友張超雄會聯同公民黨郭榮鏗，提一條關於特殊教育嘅私人條例草案，李卓人亦有一條關於統一勞工假，怕且呢一年工黨議員都會忙到暈咯。