特首梁振英日前喺英國訪問期間出席午餐會時遲到，佢致辭時解釋，因為途中見到國旗專登落車影相所致，政府新聞處當時發嘅稿寫住，佢係話見到「Our country's flags」，明顯因中國國旗而巧滾動，勢估唔到，呢單新聞有咁大餘波。
新聞處冇公佈曾修改
繼梁振英其後特別喺網誌撰文兼貼圖，強調路經之處其實係掛咗「中英兩國國旗」，暗示當日唔只因中國國旗而遲到後，噚日有傳媒發現新聞處原來事後修訂過新聞稿內嘅演辭字眼，將「Our country's flags」改成「Our countries' flags」，其後冇提及曾經修改內容，惹嚟新聞處為CY竄改歷史嘅質疑。
八方就此問過新聞處，發言人話一般而言，政府發出嘅新聞稿如要作資料修正，會透過新聞發佈系統公佈，但如果係簡單嘅修正，或者係手民之誤，一般只會修改網上版。發言人強調，當日特首午餐會致辭篇演講稿，將countries'誤作country's，所以喺網上版改番，「以正確傳達特首嘅發言原意」喎。