張崇德與張崇基前晚在灣仔伊館舉行演唱會，李玟（CoCo）擔任表演嘉賓，崇德老婆劉美娟、向海嵐、石修夫婦及徐小鳳等捧場。兩兄弟一向以歌會友，今次開騷既玩感性又搞爛gag，崇德和觀眾分享10年前失去了兒子的感受，一度難過哽咽，他說：「我嘅仔女都有嚟，想話俾大家聽我哋點樣都行得過，佢哋叫日希同日晴。」演唱會期間，兒子還上台遞毛巾給他。兩兄弟入行多年常被人認錯，自我介紹時，張崇基說：「我係張崇基，不過佢都係，我哋唔係孖生㗎，一睇就知我基啲，佢『德』啲。」
爆新秀勝出惹不滿
CoCo上台與兩兄弟合唱《你怎麼捨得我難過》，CoCo說：「20年前一齊表演，大家記唔記得我哋係同一屆新秀。呢對兄弟最照顧我，好lucky識到你哋，請我嚟好感動。」崇德坦言當年參加新秀勝出，有人不滿，但CoCo真正戥他們開心，感謝她貴為國際級歌手也願意做嘉賓。兩兄弟騷後接受訪問時提到伊館給他們許多回憶：「我哋同CoCo嘅友誼就喺呢度開始，佢好有情義，之後各自發展都冇再合作，好開心可以再遇。」
兩兄弟全晚選唱了多首電影和劇集的歌曲外，還唱了陳奕迅及張學友的歌，崇基大晒韓文唱《來自星星的你》及扮鄭少秋腔唱《誓不低頭》主題曲。當然少不了寸港鐵的《想搭很難》，他們說：「其實入行以嚟都冇乜點攞獎，直到最近好多人上網聽歌，有首歌竟然上咗No.1。」他們又指向電結他樂手，笑說：「聽聞𠵱家升高咗4cm（指港鐵攜帶行李高度限制）。」
採訪：王連連
攝影：葉君海
