賭王四太梁安琪相識滿天下，佢其中一位手帕交就係金利豐（1031）老闆娘朱李月華。朱太每年都喺鴨脷洲舉行長者盆菜晚宴，四太舊年上台唱咗首《帝女花之香夭》，大展歌喉，今年再接再厲，仲連唱三首粵曲，總共逗留個幾鐘，就風塵僕僕咁走了，十足十明星出show咁頻撲。
四太上周六喺盆菜宴上揀咗《帝女花之香夭》、《遊龍戲鳳》等曲目，唱平喉部份，聽起嚟都幾有味道，佢一路唱，一路有幾下做手，唔係齋企喺度唱，全程十分之投入。其中有個環節，有街坊小朋友上台跟四太一齊唱，佢唱唱下又會畀個小朋友唱番幾句，𠱁得四太笑得好開心。
朱太與老公朱沃裕作為主人家，就周圍走招呼一班街坊，又跟老人家傾偈。眼見朱太好似清減咗些少，唔通為咗阿仔朱俊浩下月結婚，勞心勞力，所以人都瘦埋？朱太笑住話，自己真係好緊張阿仔嘅婚禮，因為今次喺會展筵開150圍，喺賓客方面要花心機，唔係易事。跟所有奶奶一樣，佢希望快啲抱孫，最好新抱可以生夠一隊籃球隊，仲話將來可能會放多啲時間湊孫㖭呀。