巴塞「MSN組合」嘅入波能力有幾勁就係人都知，但係美斯喺上個月受傷之後，都應該有唔少球迷擔心得番蘇亞雷斯同尼馬，會令巴塞嘅進攻火力下降。不過喺上個禮拜六嘅西甲，巴塞就憑住尼馬嘅「大四喜」同蘇亞雷斯錦上添花嘅入球，喺主場以5:2大勝華歷簡奴，用行動嚟證明巴塞冇咗美斯一樣咁勁！
23歲嘅尼馬喺呢場比賽憑住上半場射入兩球12碼，同下半場兩分鐘之內連入兩球，成功將比賽變成佢個人嘅入球騷，佢亦都成為自2004年效力西維爾嘅巴迪斯達後，第一個喺西甲聯賽上演「大四喜」嘅巴西球員。暫時以八球領先西甲射手榜嘅尼馬，賽後就話入到咁多球都係因為平時練波練得多，佢好滿意自己嘅表現，但最開心都係幫巴塞贏波咁話喎。