【本報訊】零售差、舖租冧，本報訪問兩大資深舖王「波叔」鄧成波及大鴻輝主席梁紹鴻，他們均異口同聲睇淡舖位租金，一致認為商舖減租已成定局，未來一年舖租都會繼續向下，跌幅仍高達雙位數字，暫難言見底，零售持續不景亦會打擊經濟。
波叔：見到好多吉舖
舖壇打滾近40年的波叔表示：「（舖租）跌就一定，已成定局啦」。減租、劈租是一定的，行街都睇到好多吉舖，「事實嘅嘢，唔能夠夾硬來，調轉講話好好租」！至於跌到幾時？波叔坦言：「你估真係有水晶球咩」！
他指，美國經濟仍差，加上歐洲拖累，美國很難加息。本港經濟更難獨善其身，波叔不諱言，目前舖市只能見步行步，「不過咁多年平息，個個家底厚咗，襟頂啲。照道理講，其實跌得唔算犀利，事實係之前升過籠，以前廣東道租幾十萬一個月，𠵱家租幾百萬。總之，好咗咁多年，未來勒緊嘅日子要過啦」。
至於曾躋身《福布斯》香港富豪榜的梁紹鴻指出，「今年同出年做零售一定係艱苦經營，之前舖租上得太急，調整一定會出現，之前係好到你唔信，𠵱家係雪上加霜」。本港零售環境轉壞，一來受內地反貪腐影響、二來港滙轉強、加上一連串驅趕內地客行動，對零售業負面影響只會逐步浮現。
梁紹鴻憂後年未必彈
梁紹鴻指，現時只是舖租跌市中段，明年租金都會繼續跌，「今年跌咗四至五成，出年可能都有一成左右跌幅，2017年個市仲未睇得到反彈」。
過去數年租金倍升，現時舖租只是逐步重返三年前水平，就算賺錢的舖位租客都會向業主爭取減租，「冇可能隔籬左右減咗，而自己冇得減」，舖租只會繼續跌。
梁紹鴻坦言作為業主租金收入雖然減少，但不願看到香港經濟轉差。「舖租跌只係第一波，之後有零售店結業收縮，就要裁員，失業率升，零售同經濟係唇齒相依」。旅遊及零售業是香港支柱產業，既然港滙太強，歐洲遊客已一定不會來港購物，內地客已轉到日、韓消費，「只要美元一直強勢，香港都好難吸引到遊客嚟買嘢」。他相信，銅鑼灣、尖沙嘴等旅遊區未來舖租都承受壓力，珠寶鐘錶店都會繼續收縮，只有化妝品店仍會開舖，而民生消費區舖租或有輕微加幅。
記者：程俊華