去年雨傘運動，佔領區內的自修室、橫跨馬路石壆的木梯以及各式路障，相信大家都不會陌生。一年過後，默默搭建和修築這些設施的技工師傅放下雨傘，組織起來，成立民間組織「維修香港」，走入社區深耕細作，為基層市民免費提供上門維修服務，希望改善他們的住屋環境，也喚起另一場公民覺醒。
記者：張寶晶 攝影：馮就康、伍嘉亮
記者隨「維修香港」成員落區，見他們一行六人以接力形式，在土瓜灣的馬路上推着手推車，運送一部從網上徵集得來的二手洗衣機，贈予一戶住在唐樓高層的少數族裔家庭。「上七樓係第一次，大家都唔覺得辛苦嘅，但係如果要你自己一個搬，你望到可能又會有啲感嘆，點解要搬咁高？」資深裝修師傅兼組織發起人之一鬍鬚佬流着汗笑說。
無論是修理水喉、熱水爐，還是髹油、接駁電線、安裝冷氣機，「維修香港」的義工師傅都會義不容辭，自備工具，免費上門為基層街坊搞妥。至於材料費就視乎情況而定，通常由受助家庭自費購買，若遇上赤貧家庭，他們也會盡量提供。
「維修香港」主要以基層、新移民和少數族裔較多的土瓜灣舊區為據點。成員來自各行各業，除了20多位專業技工師傅，也有學生、文員、主婦、社工等，負責聯絡街坊及行政工作。逢星期三晚，他們就會聚集起來，分成幾個小隊，擺設街站和「洗樓」，看看街坊有甚麼需要幫忙，再提供維修服務。
這群師傅和義工不僅熱心，也很熱血，部分更是去年雨傘運動的無名英雄。擅長安裝冷氣的義工師傅文浩曾在旺角及金鐘佔領區留守，深受佔領人士的堅毅精神感動，「佢哋又食胡椒噴霧，又食催淚彈，仲要紮營瞓街，咁辛苦都依然堅持出嚟抗爭，為香港爭取民主」。他發現不少帳篷日久失修，若遇上狂風暴雨，更會被淋濕，甚或吹至破爛，「佔領人士可能冇呢方面嘅維修技術，我就去幫佢哋囉」。
任電工師傅20年的良哥曾於金鐘佔領區幫忙搭建自修室及鞏固路障，「警察成日嚟拆啲路障，我發覺佢哋個箝淨係可以剪到索帶，於是我就攞電線去紥，佢哋就剪唔爛喇」。他又在旺角留守過，更衝到前線與警察對峙，「我都係畀警棍打爆咗，依家口入面有舊牙骨係凸咗出嚟，咁就一世嫁喇，嗰陣時都成衫血」。
雨傘運動後，不少香港人都很迷茫。良哥坦言，即使離開了佔領區，回到日常工作，腦海內仍浮現佔領區的畫面，「我哋爭取嘅嘢，一啲都未爭取到，點樣可以繼續去行呢條路呢？」曾在金鐘佔領區留守兼吃過催淚彈的鬍鬚佬也有同感，「無論個結局有冇真普選都好，我哋都應該做啲嘢」。
今年一月，「維修香港」正式組織起來，至今已幫助了超過70戶基層家庭。組織發言人Max表示，除了幫助基層街坊改善住屋環境，他們更希望喚起另一場公民覺醒，「佔領嘅時候，似乎唔係好多人理解我哋嘅訴求，我哋希望可以透過入屋同街坊傾計，講啲政治知識畀佢哋聽，等佢哋理解多啲，關心下呢個社會」。
到底這種落區模式是否可行？萬一遇上頑固藍絲，師傅又有何對策？請留意相關報道：【雨傘一周年】水電師傅上門講公民課 拆解官話偽術。