一講到四太大仔何猷亨，大家自然想到佢嘅緋聞（實在搞唔清楚緋聞女角邊位打邊位），好容易令人以為呢位少爺只顧追女仔，唔會認真工作。作為uncle，吳士元認真回應話，何猷亨係成年人，識得分是非黑白，只要佢努力工作，其他事情，佢唔會指指點點。
佢透露，讀金融財務嘅何猷亨喺一間科技公司有份正職，有時亦會去尚嘉開會。佢讓何猷亨涉獵地產、財務、管理等不同範疇，舉例，佢曾經帶何猷亨飛去上海，跟項目同事開會，「佢有參與，聽大家開會講乜，但唔會參與決策」。吳士元清楚自己嘅位置，講到明「唔係幫四太教仔」，「如果佢哋有興趣學，我就講多啲」。佢話睇得出何猷亨好想學嘢，好想喺事業上有一番作為，只係佢哋仲細，需要時間磨練。