立法會討論特權法問責鉛水事件，港府第二把手林鄭敢於「亮劍」，痛斥泛民政治化，又自創金句「官到無求膽自大」，令人大開眼界。林鄭呢次政治演出，為佢角逐下屆特首又加咗分。中央見到好打得披上火紅戰衣怒斬黃碧雲，扭轉因鉛水事件令建制派區選被動的形勢，比起一開口就被人噓之689，實在好使好用得多。
林鄭膽大論，已經俾好多評論員狂插，指出其荒謬處，但有一根本角度被忽略，就係忽然亮劍嘅原因。表面睇係維護公務員尊嚴，為被迫飲鉛水官員維權，但政務官圈內係人都知，林鄭乃政客一名，維護下屬？講笑咩！官場人所共知佢唯我獨尊，下邊冇乜人頂得佢順，連歌王楊立門在發展局跟佢時，都頂唔順申請調走。一個認為自己全宇宙最好打之人，會為咗別人受屈辱而出手？
減低建制派區選壓力
所謂逼飲事件不過借題發揮，林鄭亮劍經過政治計算，志在打擊泛民。大家諗番轉頭鉛水事件由民主黨黃碧雲搞起，政府起初掉以輕心，因為親疏有別，到驗出超晒標後，官員仲諗住推個房屋署長應耀康去死頂就算，更上級之問責官員閃開，又將責任隊去水喉匠，結果鬧大燒通頂。
第一個判斷失誤，是出於「唔益民主黨」，認為黃碧雲乃搞事之徒，建制派甚至加入砌佢，到個case表面證據成立後，政府就亂作一團，建制派全速飛身加入砌政府官員，就係驚影響區選選情。建制要止蝕，林鄭要阻止特權法調查，大家結成利益共同體，頂住泛民立法會內攻勢。當表決特權法時，林鄭重手砌泛民，令外界以為特權法調查無理取鬧，並為反對調查的建制派減低政治壓力。
如果真係無求，就唔會用上政客手段。在政改表決前林鄭在專訪中表明下屆「三不」：不選特首、不受邀做行會成員、不會在政府擔當任何職位，甚至連論政也不會做。假如三不是林鄭下的終極決定，官到無求，為何她的膽量，會是用來對付民意代表，對付長期飲用鉛水的無辜市民，會用來討好兩權合作強勢行政主導呢？
香港政壇有班盲毛，一直視港英政務官出身之林鄭為香港良心Version 2.0，包括民主黨、公民黨，其政治幼稚病實在令人驚訝。如果林鄭真係有豁出去的勇氣，亮劍應該係指向禮崩樂壞，甚至推行對港強硬路線之中央官員，應該為港大陳文敏事件公開表態反對校外干預，為全民退保、標準工時「走數」在即而公開致歉，為自己任內無法阻止管治走向極端化、背離香港核心價值而乞求市民原諒。如石永泰所言，為日益受自由行影響生活的市民，講句公道說話。一個政客幾年來「政治正確」，滿口鸚鵡學舌「方方面面、依法治港」、如履薄冰，唔敢講一句公道話，真係「官到無求」？當年陳方安生堅決反對「四不像問責制」破壞行政主導，受副總理錢其琛訓斥而最終提早退休，呢種就真正有擔當、有信念。
上聯「官到無求膽自大」，下聯「人變無恥唯亂噏」；橫批四字「天下無敵」。
添馬男