華人騎師這天原本靜過自修室，不過下半場一贏馬就打孖上，先有女將蔣嘉琦第七場贏出沈廐「勝利寶石」，到了第八場二班泥地1200米，輪到梁家俊以姚廐「好精神」爆冷勇奪仁濟盃，鞍上人直路出盡飲奶力，狂鞭狂推才僅僅趕過對手，功勞甚大，六歲馬2014年1月建功後，逾年半以來，取得本身來港後第四捷，蔣、梁兩師兄妹，攜手包辦第七口孖寶。
賽後「大少」林建名，代表仁濟醫院，率領一眾藝人，包括胡渭康、范振鋒、戴夢夢、趙雅芝兒子黃愷傑，以及一襲連身黑色長裙look的何傲兒等現身凱旋門，搶去不少風頭。
除了「好精神」，姚本輝連同第五場由雷神贏大熱門「奮鬥雄心」，今季首度起孖即有盃落袋，季內頭馬增至半打，惟谷草卻尚未開齋。至於梁家俊，連輸兩期後亦告重響勝鼓。
第八場泥地盃賽同時開埋華將連贏，跑第二係何澤堯座騎方廐「十二門徒」，方嘉柏上年憑「星運俊爵」同柏寶合作勝出仁濟盃，今年卻功虧一簣，未能蟬聯桂冠。三、四名係洋將天下，順序為郭能「喜益善」及田泰安「英勇大師」，四重彩派超過10萬元，係全日暫時最冷一場。