特首梁振英日前喺英國倫敦訪問，出席咗個工商界午宴演講，點知遲到咗幾分鐘，佢即場解釋因為車隊路過近白金漢宮嘅The Mall，道路上顯眼位置掛咗五星旗，準備迎接訪英嘅國家主席習近平，車隊就停低睇咗陣，噚日佢再喺網誌貼相（圖）解畫，不談遲到，只稱：「秋天的金光下，莊嚴的同時，也顯得色彩繽紛。我們的車隊停下來，同事們都走出車外，舉機拍照留念。」
睇國旗睇到咁忘我，難怪係「超然特首」。民建聯立法會議員譚耀宗噚日同傳媒傾開CY愛國表現，笑笑口話對方「搵啲藉口箒」，之後補多句「稱讚」CY「咁有感情嘅人」。八方下次返工遲到，唔知同上司講掛住欣賞國旗，過唔過到骨呢？