近年郊野公園嘅垃圾分類回收箱成為馬騮覓食「寶庫」，漁護署特別改良回收箱嘅設計，慎防奀皮仔摷到滿地垃圾。負責管理郊野公園、入職36年嘅漁護署高級農林督察羅傑明話，金山同城門郊野公園最多馬騮，一見遊人扔垃圾，佢哋就「尋寶」，垃圾四散惹衞生問題。
設計改完又改
其實漁護署早已引入有蓋嘅回收箱取代無蓋嘅圓筒垃圾桶，點知班馬騮喺掩門伸手入內。漁護署曾封咗掩門，改喺箱頂加裝仿似煙囱嘅圓口畀市民放垃圾，點知馬騮醒到用腳勾住煙囱邊緣，倒掛竄進箱內摷。
漁護署其後決定喺箱口設旋轉葉，馬騮若伸手入去會被旋轉葉攔阻，但考慮到小朋友扔垃圾時會被旋轉葉弄傷，佢哋再改良，新試驗版本嘅回收箱設腳踏，只要踩腳踏，回收箱口會向前傾，放入垃圾後提腳箱口就會關閉。呢款腳踏式回收箱喺城門郊野公園試用已半年，暫時未被馬騮破解，漁護署擬大量生產，明年起放喺金山同城門郊野公園使用。