喺西甲呼風喚雨嘅基斯坦奴朗拿度（C朗），上周六入一球幫皇馬主場輕取利雲特3:0，兼終於獲西甲聯賽會承認打破魯爾嘅入球紀錄。咪以為佢咁勁就個個都會畀面佢，金像導演馬田史高西斯（Martin Scorsese）就硬生生請佢食檸檬，連個「大茄」都唔肯畀佢做。
入324球終超越魯爾
C朗喺兩個幾禮拜前作客馬模場歐聯入兩球，獲皇馬確認佢累積入咗324球，取代名宿魯爾成為銀河艦隊史上入波最多嘅球員，但由於西甲聯賽會將佢其中一個西甲入波判咗畀比比，所以只係承認佢追平魯爾嘅323球紀錄。不過喺上周六，呢位葡萄牙球星終於名正言順做皇馬第一。
着咗對一剔324K金砵嘅C朗攻入一球，協助球隊喺巴拿比奴大勝利雲特3:0；賽後西甲聯賽會、歐洲足協，以及外國主要通訊社包括《美聯社》等，都確認佢喺310場波幫皇馬入咗324球（皇馬官方數字係325球），取代魯爾成為皇馬史上入波最多嘅球員。
借豪宅拍戲演大茄被拒
C朗喺綠茵場上事事順利，但出咗球場就唔係佢想點就點。英美傳媒日前報道，06年拍《無間道風雲》贏得奧斯卡最佳導演嘅馬田史高西斯，就睇中C朗喺紐約特朗普大廈（Trump Tower）間豪宅，想借嚟拍佢套新戲《The Manipulator》；成日想向娛樂圈發展嘅C朗就打蛇隨棍上，同馬田史高西斯講借屋冇問題，但就想頴番個「大茄」嚟做，點知馬田史高西斯就請佢食檸檬。據知情人士表示，馬田史高西斯原本應承畀個角色C朗，不過佢諗過度過之後，擔心C朗妹仔大過主人婆，會搶晒主角鏡，所以決定唔侵C朗玩；但佢都好識做，會畀1,000萬歐元C朗，當係租屋拍戲同安撫嘅費用。
C朗食檸檬之餘，最慘仲做埋儍仔。日前佢將同巴西超模Alessandra Ambrosio嘅合照上載至自己社交網站，仲大賣關子話佢哋有個「秘密計劃」。消息話Alessandra Ambrosio有份參演馬田史高西斯套《The Manipulator》，但C朗就冇份，真係𤓓爆。