跑完前六場雷神憑葉廐「勝在煌」、姚廐「奮鬥雄心」、東廐「尊兄」大演帽子戲法過後，第七場三班1000米直路賽，雷神製造另一個高潮，佢騎蔡廐在港初出大冷門、馬會前主席夏佳理名下之三歲愛爾蘭自購馬「紅運精彩」，三檔出閘，出閘跑咗一兩幾步，雷神突然從馬身左邊跣咗落嚟墮馬，唔知係咪馬鞍滑移，好彩佢做足準備兼眼明手快，一落地即刻企番起身，身體絲毫無損，餘下場次可繼續上陣。
至於「紅運精彩」空馬沿中叠無遮無掩地越跑越起勁，最終更率先衝過終點，不過空馬冇騎師，按賽例當輸，此駒亦冇唔公平出閘，因此馬迷投注冇水回焗輸。
呢場直路賽真正勝出馬，係續配女將蔣嘉琦減十磅之沈廐馬「勝利寶石」，此駒沿途放鳶跑主動，末段猶有餘勁，加埋空馬「紅運精彩」臨尾向內切入，阻到一對追兵「聰明申報」及「幸運明星」，間接造就嘉琦BB可以幫此駒爆出11倍綠燈win，佢個人亦繼徐廐「頌友」，連續第二次日賽贏馬，而沈集成馬房連同頭場贏「港林飛魚」，季內首度於日賽起孖。
今場由「聰明申報」影相氣走「忠心義氣」及「幸運明星」跑第二，其中「幸運明星」因受空馬「紅運精彩」干擾，臨門柏寶抽起，就此位置不保只得第四，不過季軍馬「忠心義氣」中段其實亦曾受阻嚴重，四重彩派六萬二千幾。
這天三T冇人中正獎，中頭兩關安慰獎派一千五百幾，有144萬幾多寶撥入本月25日沙田日馬。