因鉛水事件要幫公僕討回公道嘅政務司司長林鄭月娥，一句「官到無求膽自大」惹唔少抨擊。噚日佢出席兩項政府有份畀錢嘅大型體育活動，先喺朝早嘅維港渡海泳負責下水禮鳴槍，晏晝就去維園睇香港網球公開賽女單決賽，比賽未開始已經到場。
呢場由塞爾維亞球手積歌域對德國姬芭嘅決賽打足兩個半鐘，佢冇離開過睇足全場，當見到兩人合演靚波時都會拍掌。全場比賽相安無事，不過當司儀介紹林鄭出場做頒獎嘉賓時，場內突然傳出噓聲，佢當然處之泰然，照樣讀演詞同頒獎畀冠軍球手積歌域，之後立即鬆人。一班記者喺場外等足兩粒幾鐘，林鄭掂行掂過冇理記者囉。