中國公佈第三季經濟增長，如果保七又話太假，6.7%至6.8%就啱啱好，起碼說明中國並非重走保增長舊路。
內地人對國家經濟數據都不以為然，認為刻下生活對經濟感受，比起似真非假嘅數據更實際。最近廣州舉行嘅廣交會，有內地中小貿易商戶話生意差已經意料之中，家陣接西班牙或意大利嘅歐洲客定單，不只要討價還價。
以往就話美國經濟打個噴嚏，其他經濟打冷震。同一句話套用於今日中國經濟亦可，強國有乜頭暈身㷫，亦牽動其他經濟體，尤其依賴出口資源到中國嘅新興市場。受美國加息路向未明影響，環球量寬後熱錢過剩未改。今年初市場擔心美國加息，資金逐步由新興市場回流美國，加上美元強勢，新興股滙債跌殘。但10月初資金流逆轉。今年表現最差的兩隻新興貨幣巴西雷亞爾及馬幣，截至9日止一星期，分別反彈近半成至一成。不過今日經濟主旋律變調，全球增長放緩同受通縮威脅，投資者對加息狼來了顯然唔在意。
今輪游資調配到新興市場，應該只係早兩、三個月前大跌後，補倉帶動反彈。如果話市場表現同經濟表現背馳，其實投資者買賣爛鬥爛。資產價格越跌得平，大家越搶，直到跟價位脫離基本因素後，炒到殘先再搵過另一樣資產。
C+B
本欄逢周一刊出