本月底退休嘅港台監製謝志峰，噚日完成最後一場由佢監製嘅《城市論壇》，一班台前幕後同事預備咗鮮花、蛋糕同燒豬，喺節目完結後同慶賀兼補祝佢8號生日快樂，廣播處處長梁家榮（榮總）亦親自到場代表大家向謝志峰送上巨型心意卡，封面畫有謝嘅卡通肖像，又寫有「自由空氣滿維園，發表言論你有權」，內裏寫滿台前幕後工作人員嘅感言。
謝志峰話繼7月退下《城壇》主持，循序漸退，今次連監製工作都完成，係真正告別《城壇》，感覺就有啲落寞，「話晒10幾年感情」，但大家或者好快又喺大氣電波見到佢，因為佢透露已經搵到新工，都係喺電台電視台做嘢，遲啲就會公佈。