新亞校友陳增濤自巴黎回港，一離開赤鱲角機場就傳來短訊約吃午飯，本來要等到兩個星期後先至有空檔，點知金融M來電話次日有緊急會議要出席，取消次日嘅午飯約會，於是立即應承陳增濤，此之為有緣能相會也。講都唔信，金融M約食飯係三個月前之事，點知佢有一次跌親隻腳，一次臨時大感冒，講唔到嘢，今次第三次嘞，又俾公司捉咗去開緊急會議，第三次臨時取消約會之後，金融M來短訊告知，排期到十一月某日，聽落好似比較誇張，其實一啲吃香之中環人往往有身不由己之苦。
中貿林聞風而至，同行嘅仲有來自洛杉磯之玩具W。玩具W與中貿林係中學同學，左丁山早已知之，但此日一問之下，原來陳增濤回港，並非係為咗推廣佢本新書「葡萄園泥土上的水──法國紅酒尋味」（商務印書館出版），而係專誠為咗參加中學畢業50年重聚宴會，喺10月12日晚於快活谷馬場馬主廂房舉行，佢地三人及玩具W太太均是東華三院第一中學（九龍塘牛津道）1965年中五畢業生，今次有超過60名同學重聚，好不高興，當然還有十幾位當年老師及現任校長（中貿林之崇基師弟）。嘩，畢業50年，以前細路仔時聽到粵語武俠片一句對白：「18年後又係一條好漢」，就覺得18年十分遙遠，點知現在老之將至，先發覺50年眨眼即逝，歲月不留人。
玩具W夫婦與陳增濤分別自羅省與巴黎，回港參加中學同學Reunion，十分情長。講起舊事，佢地三位讀書時，都是窮小子，玩具W為了生活，索性一早投入社會工作，在玩具行業打滾，後來移民美國，依家係幾間公司董事，中貿林與陳增濤繼續苦讀考入中大，有咗學位之後，從此脫貧，一個在法國擁有葡萄園釀私家紅酒，一個家居東半山印印腳，可知教育是戰勝貧窮之重要武器，無論新派學說點樣講政府津貼、政府扶貧都好，實際上避免跨代貧窮還是要靠自己。
午飯後回到辦公室睇紐約時報，知道菲律賓有另類反政府示威，全國民情洶湧反政府，究竟所為何事？原來阿奎諾總統堅決要將菲律賓學校制度由十年延長至十二年，與國際標準接軌，幼稚園教育變為強逼性，但菲律賓人民竟然連讀多兩年中學都反對！民意話民眾負擔不起學費及機會成本，學校唔夠課室，兼且唔夠老師，人民更想學童早啲畢業離校去打工幫補家計，唔想再讀書！