【汽車籽：馬路起義】
電驅方程式（Formula E）明年首度在港舉行分站賽事，將會像澳門及新加坡般封街作賽，背景更是美麗的中環海濱及維港景色。可惜資深F1評述員米高（Michael Shum）卻毫不興奮，更向記者大數電驅方程式的不足，「冇engine聲冇氣喉聲，刺激唔到腎上腺，萬三蚊張飛？五百蚊都嫌貴啦！」
上年香港臨門「撻Q」，今年卒之成功申辦Formula E分站賽事，明年10月佔中飛越龍和道，還有維港美景與摩天輪陪襯，全城雀躍，特首也在上周發佈會中亮相力撐。不過著名車評人Michael Shum，偏偏在其facebook上，向推手之一的香港汽車會及梁特潑了一盆冷水，「純電推動方程式賽車，睇落好高科技，但睇咗第一屆之後，已經知道唔可能同傳統一級方程式媲美，冇引擎聲冇氣喉聲，只有電摩打運轉嘅高頻聲，完全刺激唔到觀眾嘅腎上腺。當然，喺環保角度係值得嘉許嘅，但票價咁貴，都係為求刺激，睇佢哋靜靜咁跑，萬三蚊一張VIP門票，價值喺邊？」記者曾跟汽車品牌Infiniti到英國銀石賽車場看F1，直路加速衝刺時真的嘈到拆天，不戴耳塞的話耳仔會隱隱作痛，加上難聞的廢氣、電油味、燒胎味，不過身體受罪，大腦卻很享受這股刺激快感。
按大會資料，賽道路線圖也有了，在中環摩天輪附近跑，全長約兩公里，衝刺加速主要在龍和道一段。我們索性實地視察，正常地試走一圈。「Formula E賽事大多數喺鬧市舉行，因為電池先天續航力嘅關係，唔會有太長嘅直路加速，因為會加劇電力消耗，所以會鬥彎為主。但睇番由IFC Apple Store開始，雙線行車路面都幾窄，跟住已經係迴旋處同摩天輪對開嘅180°調頭彎，加上圍欄等嘅改建，路面將會更窄，基本上係玩「拉龍」，好難爬頭超車。喺龍和道大概半公里多啲嘅直路加速，算係最刺激㗎啦，但咁短嘅路，真係好懷疑有冇可能好似大會講咁極速有225km/h，我估計大概只係去到180km/h。」
「間場要鬥人力車？」
其實萬事起頭難，尤其少做少錯的特區政府，能有國際級賽事已難能可貴，最重要是帶動氣氛、把香港推廣到世界各地。「這是我另一個擔心嘅地方。賽事嗰數天嘅program到底點安排？真正嘅一級方程式，喺排位賽或者休息嗰陣，會加插其他同樣刺激嘅賽事，例如GT房車賽同電單車賽等等。香港呢？嗰條路可以鬥乜車？如果鬥電油車嘅話，嗰啲引擎聲同電油味，更加吸引到觀眾，搞到電驅方程式變得更淡而無味。要靜要環保嘅話，係咪要鬥單車同人力車？定係加插波子、林寶堅尼嘅炫富巡遊？飲飲食食唱歌之類嘅嘉年華環節，只係輔助節目，核心價值仲是賽車。咪話萬三蚊一張門票，就算最平嘅五百蚊飛，我都嫌貴！」
別以為Michael Shum只是「百彈齋主」，其實他只是愛之深、責之切，十分希望香港能推動真正的賽車運動。「香港係一級城市，要搞當然揀啲一級方程式賽事。除咗世界盃，F1係全球最多觀眾嘅運動，而且賽事比四年一度嘅世界盃更緊密，嗰啲富貴級觀眾，是會一團一團咁去勻每個分站，唔單止帶動到當地經濟，仲可以大幅提高國際間嘅知名度，你看看新加坡幾成功就知。香港大費周章搞Formula E，又冇其他電油車賽事嘅話，中港澳車手點參加？只能夠繼續喺外地鬥車？咁樣係可悲嘅一件事。」距離正式賽事足足還有一年，希望大會好好考慮Michael Shum的憂慮，從善如流吧。
記者：徐影龍
攝影：黃子偉
部份圖片來自FIA國際汽車聯合會官網
編輯：陳國棟
美術：楊永昌