日本漫畫《足球小將》就教大家比賽未完場都唔好放棄，上周六日聯就有兩場波演繹出憑住永不放棄態度而反敗為勝嘞，其中鹿島鹿角主場對柏雷素爾，客軍上半場已由鈴木大輔同基斯坦奴達施華各建一功，半場領先2:1，下半場鹿角急起直追，金崎夢生69分鐘追平，戰至補時一分鐘，19歲小將鈴木優磨門前建功，幫鹿角戲劇性反勝3:2，全取三分諗住升上榜首，不過開心唔夠兩分鐘，廣島三箭（圖）又做番榜首。三箭呢場險勝川崎前鋒又係精采，三箭由柴崎晃誠先開紀錄，前鋒就由老牌國腳大久保嘉人83分鐘追平，諗住拎到一分，點知前鋒後防補時三分鐘嚴重犯錯，被三箭中場山岸智射入空門，三箭以2:1險勝，同鹿角齊齊14戰拎31分，繼續以得失球差壓住鹿角，排第二階段榜首。