仲記得五年前，謝拉特話祖高爾嘅腳法仲勁過美斯，但喺呢五年，祖高爾就越踢越沉，離開利物浦同韋斯咸，𠵱家沉到連維拉都踢唔掂，呢位曾經贏過三次英超冠軍嘅前英格蘭國家隊中場，聽日就會被外借至英甲嘅高雲地利。
借往高雲地利35日
英甲嘅高雲地利宣佈，佢哋緊急借用33歲嘅維拉中場祖高爾，為期35日。聽到呢個消息，我求大俠同唔少球迷都嚇一跳，一代英格蘭天才，淪落踢英甲，但冷靜諗一諗，人浮於事，加上祖高爾年紀都有番咁上下，如果想落場踢吓波，轉戰低組別聯賽都係一個面對現實嘅決定。高雲地利領隊蒙比就開心到震，「我認為祖高爾到咗一個只想享受足球嘅年紀，同埋要計劃未來。佢已經33歲，足球生涯可能得番幾年，佢可能想趁仲有心有力，去幫助更多年輕球員成長。」祖高爾喺維拉嘅周薪成兩萬鎊，原本高雲地利係畀唔起，但蒙比透露，祖高爾願意收少啲人工，「借用呢個決定對大家都好，祖高爾可能係有唔同原因而適應唔到，但有樣嘢唔使懷疑，佢嘅技術同質素係超晒班。」祖高爾星期一就會正式以借將身份加盟。
曾助車仔三奪英超冠軍
祖高爾呢個球員相信伴隨一代球迷成長，佢千禧年初喺韋斯咸出道，腳法好之餘又有足球智慧，被稱為加斯居尼之後技術最好嘅英格蘭球員。2003年，佢轉投車路士，逐步踏上職業生涯的巔峯，幫球隊三奪英超及英足盃冠軍。講到代表作，就一定係2006年世界盃，佢代表英格蘭鬥瑞典，射入一記窩利笠射！2010年，佢轉到利物浦，嗰陣紅軍隊長謝拉特仲讚佢：「美斯可以做到嘅事，祖高爾亦一樣可以。」但祖高爾結果無法喺利物浦立足，曾外借至里爾，其後轉投母會韋斯咸，去年再投維拉。今季，祖高爾英超都冇踢過，剩係踢過一場英聯盃，坐冷板都坐到冇晒癮。我求大俠希望祖高爾可以喺英甲搵番踢波比賽嘅樂趣。