周日唞唞 有調查話香港係世界上最攰嘅城市，恭喜香港又攞咗個世界之最，打工仔返工返到癲，仲邊有心機做運動吖，除非你正職係運動員啦。運動，係奢侈品。
周一開會 一班體育界熱心人坐埋幾枱，一人幾句腦震盪，一齊度吓有咩好蹺刺激香港人做運動嘅意欲，有着數會唔會多啲吸引力呢，可以刺激一班唔運動嘅都郁吓喎！結果我哋連做運動可以退稅都諗得出。運動，要推銷。
周二游水 平日早上嘅公眾泳池，最多嘅捧場客就係老友記，佢哋追求嘅好明顯唔係速度，而係溫度，老街坊朋友嘅親切溫暖，去泳池重點唔係游水係吹水。運動，係社交。
周三跑步 借啲意返母校歡樂跑，乘機緬懷當年情兼吸收一下新生代氣息。師弟們投入得嚟又落力操，香港隊都出咗幾個，確係叻仔，但最深印象係八位組隊接力嘅肥仔，個個大大件，但你唔好理，輸人唔輸陣，雖然包尾而回但盛興而返，快樂指數唔少得過第一名。運動，要happy。
周四傳奇 睇經典鬥傳奇，好多回憶，好多肚腩，幾鋒利嘅刀都有機會生銹，但幾鈍嘅刀都可以保養得宜，長用長有。運動，係長命功夫。
周五踢波 球場遇上一班小學同學仔，有男仔有女仔，「不如玩遊戲啦！」「好呀！」男仔簡直係異口同聲，但女仔有啲猶豫，「男仔踢波叻啲喎？」「試吓先啦妹妹仔！」第一回合搶波考反應，女仔竟然贏哂；第二回合射波考平衡力，打和；第三回合嚟個集體射門，十幾個一齊射十幾個一齊守，結果男仔一啲都唔憐香惜玉之下入咗唯一一球，贏番鋪！運動，係公平競技。
周末睇波 等咗成個星期，就係愛回家睇愛隊喇。運動，就係精神食糧。
KEYMAN
電郵：mailto:[email protected]