晉安團體旗下的「帶」系馬中，上季「帶盈來」兩捷四班賽，中低班馬匹大家印象未必太深刻，反而兩次贏馬後，團體成員王家揚的女友Christine現身凱旋門，不少網民大讚她漂亮動人，而兩人亦經常拍拖入場為幾匹愛駒打氣，可惜自「帶盈來」兩捷後，另外兩駒「帶利來」、「帶寶來」都無突破，「帶利來」更已退役，而「帶盈來」、「帶寶來」則雙雙拉離吳定強馬房，分別加盟容天鵬及告東尼。其中「帶寶來」轉倉後上季尾匆匆四戰三度上名，足以反映呢班馬主幾咁鬥志如虹
上述兩匹轉倉馬，踏入今季暫時仍未報名上陣，幕後可能開始有啲心急，今朝(17日)「帶寶來」出試快活谷第六組1200米大閘，王家揚同女友Christine等晉安團體成員，一齊到場監督，明顯好緊張愛駒嘅進度，而「帶寶來」亦好生性，喺郭能胯下跟放至直路加速透出，以強勁走勢彈甩對手個多身位，輕易勝出，亞、季軍是「飛龍在天」、「佳景名駒」。而灰馬「帶盈來」就喺第八組1000米閘配湯智傑跑第四。
試閘後告東尼親自向Christine等人講解「帶寶來」嘅情況，大家都似乎好滿意隻馬嘅狀態，搞到Christine鬼咁開心笑晒口，隻馬外國及香港出賽次數都唔多，相信仲有進步空間，稍後應唔難打開勝門。