隔咗咁多年再拍續集，侏羅紀班恐龍依然有心有力，《侏羅紀世界》票房同影碟銷量又再突破天際。呢啲戲擺明玩大動作驚嚇，唔去朗豪坊睇4Dx簡直嘥咗套戲，花兩嚿水畀張4D凳搖足兩粒鐘，好似玩咗一段漫長嘅過山車咁，雖然搖到龍叔叔副老骨頭幾乎散咁滯，不過呢啲臨場刺激感又真係4D先體驗得到。藍光碟一出，知道昌哥必定幫龍叔叔留定3D版，睇碟唔使急，最緊要放工快，拿拿聲趕埋稿返屋企煲恐龍。
侏羅紀最勁嗰隻暴龍，已經威咗三集，嚟到第四集唔係仲同速龍玩一揪三呀？編劇好嘢，恐龍溝青蛙DNA你哋都接受到，劇情合唔合理係好次要，最緊要恐龍夠霸氣夠驚嚇，今集索性更天馬行空，玩恐龍溝恐龍，卒之搞咗隻帝王暴龍嘅物體，又聰明又巨型仲識隱形，屈機到爆。戲內有句對白都幾自嘲：「恐龍樂園隔幾年就要諗啲新嘢，觀眾先會繼續幫襯㗎！」咁搞法，咪可以好似《X-Men》同《Heros》咁，久唔久走隻新嘢出嚟，長拍長有囉？
睇睇吓，龍叔叔不禁苦笑，侏羅紀樂園其實幾似香港縮影。二萬幾人被困樂園，似地產佬嘅老闆只想榨乾佢哋啲錢，又有衰人心懷不軌，以軍隊打壓異見人士，暴龍、速龍、帝王暴龍呢三隻衰嘢，第一隻肥屍大隻冇乜腦、第二隻鬼鬼祟祟乜都貪、第三隻仲衰，狡猾刻毒兼涼薄，各有各恐怖同騎呢，仲有一堆翼龍扮獨立空降偷襲，平民只好任佢哋噬咬。想反抗？暗角咬一鑊後再話你先撩者賤。
居然同速龍BB係老友
拉遠咗喇，講番套戲。新恐龍唔係最大爆點，最令龍叔叔笑不攏嘴嘅，係居然講到幾隻速龍自細被主角訓練，隻隻有名有姓，識得聽指令stop同attack，仲曉聞嘢玩追蹤，乖過導盲犬小Q。無所謂，對呢類戲抱住認真便輸了嘅心態，幾無稽都唔緊要，你畀番咁上下視覺同聽覺刺激我就得喇。電影拍得唔錯，動作場面設計雖不及史提芬史匹堡操刀嘅頭兩集，不過都叫花過下心思，好似主角騎住電單車，黑夜中同班速龍BB並肩作戰，簡直型到冇朋友。仲有成隻郵輪咁大嘅滄龍，學海豚咁跳上水面食鯊魚，結局一幕速龍仲會同暴龍聯手，揪低萬惡嘅帝王暴龍等等，都係睇到龍叔叔拍爛手掌。
龍叔叔買嘅係2D+3D雙碟裝，3D電影睇到有啲麻木，《侏羅紀世界》又冇乜特登飛埋身嘅3D場面，效果一般，以為有好多勁3D場面嘅人，可以慳錢買2D版算數。好彩畫面質素不俗，幾幕黑夜追逐嘅detail位處理得好好，增加唔少刺激感。聲效方面，雖然無用到Atmos，不過DTS-HD MA 7.1都已經夠照，暴龍張大喉嚨咆吼嘅震撼度相當足夠，臨尾翼龍圍城嘅環迴音效亦係驚喜之一。容量關係，Bonus擺咗喺2D隻碟度，有刪剪片段、花絮同訪問，最貼心係有晒中文字幕，睇吓幕後點炮製出呢堆恐龍，都幾過癮。
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：李寶筠
美術：楊永昌