周日(18日)沙田第十場二班草地1800米，本來去年澳洲打吡殿軍「聰明才智」強配雷神，會是爭勝主角，呢匹大隻仔上次季內初出未熱身，兼且內欄受困都輸唔遠，跑過一仗後由雷神悉心操練，今仗機會應該幾突出，點知因為左後腳受傷，經已退出。
「聰明才智」掛免戰牌，最開心當然係一對南非練馬師霍利時及苗禮德，呢場佢兩個嘅「勁趣」、「人強馬勁」均是牌面馬，家陣少隻香爐少隻鬼，當然提升贏面。
尤其霍利時，佢對「勁趣」更係信心十足，呢隻馬上季贏二班2000米，打吡亞軍「直震撼」亦係蹄下敗將，霍利時話「勁趣」上仗季內初出，1200米明顯嫌短，都跑得第四名，最後二百米佢爆嗰段竄勁，走勢令人很驚訝。霍利時直言「勁趣」當時只是熱身性質，估不到表現咁好，拼後一早將目標鎖定今仗1800米，雖然對手如「安荃」、「文藝復興」都好強，但霍利時話有信心「勁趣」遲早可殺上一班，因此今場有一定期望。
至於「人強馬勁」，該駒騎師霍勵賢嘅睇法，卻令人意外，佢話「人強馬勁」三戰同程田草1800米全勝，原本真是好勁，無奈認真欠運，一知道排大外檔，即有Hopeless（機會渺茫）的感覺。霍勵賢指「人強馬勁」最怕被迫走三四疊，大半程望空跑，浪費馬匹體力，家陣唯有臨場執生，希望攝位成功，找到遮檔，先有偷襲本錢喎！