【中環】坐擁家族千億資產的新世界主席鄭家純（純官）年近七旬，近年積極將生意交給子女如大仔鄭志剛幫手接班，慢慢退下火線，享受爺孫親子樂。純官前晚帶同老婆葉美卿到了中環蘇豪區嘆西餐，同行還有一對分別約5歲及1歲多的小男女孩，估計是大仔志剛的一對子女。純官就以簡約的西裝look，襯以Hermès皮帶，而純官老婆就以白色上衣及黑褲，再襯Hermès手袋，打扮尚算年輕嫲嫲。
出巡大陣仗
純官夫婦出巡開餐，準備工夫做到足，一對孫仔女各有一名保母照顧，但小朋友應該好快醫飽肚，開始坐唔定，身穿蝙蝠俠cosplay服飾的大孫仔開始在餐廳周圍走，而小孫女則由一位保母抱着，與餐廳侍應玩波波，相信純官一家都是餐廳熟客，而純官就安心與老婆撐枱腳。大約8時許，眾人吃完晚餐，純官負責埋單後就獨自先行出餐廳，看似有急事，原來他從西裝掏出一盒牙線，一心想「撩」牙，不過在場的保鑣即提水有記者影相，他就冇癮地將牙線放回西裝。
雖然太太依然留在餐廳內打電話，但純官亦很有耐性地等對方，一對孫仔孫女亦等埋嫲嫲一起步離餐廳，之後大孫仔就活潑地走出行人路，而純官老婆即着緊地拖到實，而純官就淡淡定，待等齊人後才步出馬路上七人車。作為爺爺的純官雖未有同孫仔孫女太多互動，但亦先安頓他們、保母及老婆上車，盡顯細心。
採訪、攝影：吳耀輝、梁繼光