行山遠足同埋長跑近年大受歡迎，八方估唔到寶蓮寺（圖）都加入熱潮，喺11月7日於大嶼山昂坪舉辦首屆慈善越野跑賽事，仲改個名叫「佛你跑」，原來呢個「佛你跑」起源都有段故。
寶蓮寺首座釋健釗法師，去年同佛教筏可紀念中學師生家長組隊玩毅行活動，認識咗資深跑手陳國強，健釗法師想推廣跑步活動，於是佢哋就決定搞「佛你跑」。
今次比賽沿途可飽覽昂坪同天壇大佛景色，頭十名得獎者更可免費享用齋菜做獎品！
雖然一千個參賽名額已滿，但市民仲可以去「佛你跑」fb（ http://www.facebook.com/BuddhaYouRun ）分享長跑好處，一樣有機會獲得齋券。