國寶大熊貓盈盈流產，當時已有花生友話，嚟親香港嘅國寶都冇乜好下場，如果北大人問罪，海洋公園點都走唔甩，點知咁快真係有人人頭落地。
海洋公園噚日突然公佈，做咗12年嘅行政總裁苗樂文（圖）約滿後唔再續約，明年8月1日離職。新聞稿話苗樂文幾個月前已知會公園有意要走，原因係追求其他事業發展同埋個人興趣。但公園冇幾耐之前至公佈一大堆發展大計，家陣水上樂園同酒店都未開工，最高統帥就唔撈。
加上今年2月苗樂文受訪時話，雖然內地客仍然係海洋公園未來最主要客源，不過佢認為唔使刻意迎合內地客需求。估唔到前主席盛智文一走，老臣子就坐唔住！
新主席孔令成透露苗樂文之後有意留港發展，所以非常樂意邀請佢做公園嘅諮詢顧問咁話。