署理食物及衞生局局長陳肇始（圖）噚日做替更，上立法會發言回應出動特權法查鉛水嘅議案，不過八方見佢帶傷上陣，右手紮住三角繃帶去開會，為乜副局長搞成咁？八方即時問候陳肇始，佢話自己做開健身，前排唔小心失平衡跌咗落地，搞到右手近虎口位嘅舟骨骨裂，所以要用護腕固定好隻手，同埋做6個星期治療。佢話平時做健身都有教練睇住，但整親嗰日咁啱就冇，認真唔好彩。
更令八方估唔到係，推動醫保計劃係食衞局重點工作，但原來陳肇始並冇買醫療保險，相信今次整親就係一個警惕喇。
講開鉛水辯論，噚日民建聯譚耀宗突然tree根上身，將「一朝被蛇咬，十年怕草繩」讀成「十年怕草『蠅』」，唔通真係近朱者赤、近墨者黑，連一向中文唔錯嘅譚耀宗都俾tree根「教壞」？