美酒佳餚巡禮下周四開幕，八方收到風，今年手工啤酒係亮點之一。八方都略懂皮毛，手工啤有好多唔同味道、風格，好似有蜜糖、朱古力、水果等味，仲有佛手柑味，同埋澳洲排名第二、好似柑桔青檸嘅啤酒。
專營手工啤酒批發及零售嘅The Bottle Shop品牌經理鍾詠兒教路，手工啤酒味道千變萬化，跟葡萄酒一樣可配唔同食物。
清淡如海鮮、沙律，可選Lager、Steam Ale及Golden Ale。肥膩同煎炸食物，可配重啤酒花苦味嘅IPA啤酒（Indian Pale Ale），中和肥膩感；辛辣食品，可配帶辣味嘅澳洲La Sirène Saison（圖）。咦，篤住咖喱魚蛋一邊飲，正爆。