講到大閘蟹，都係八方嗰杯茶；9月圓臍10月尖，雖然係老生常談，過咗中秋，啲大閘蟹真係肥美好多。阿一鮑魚楊貫一嘅高徒、富東海鮮酒家揸fit人林永春（圖），趁銅鑼灣新店開張，今年創新用陽澄湖大閘蟹，搞咗一道「醉浴蟹場」菜式。
用花雕同大閘蟹洗白白咁搞嘢？春哥話，呢道菜用咗5両重陽澄湖大閘蟹，再用薑、葱、當歸等，浸喺花雕酒煮15分鐘，目的係用當歸中和大閘蟹寒氣，以花雕酒帶起蟹香。八方手多多，拎隻蟹聞吓，果然酒香逼人。
春哥賣醉蟹賣埋「大包」，佢話，大閘蟹每隻定價138蚊，客人叫第一隻特價128蚊，之後再叫第二、三隻半價64蚊，「無論食幾多都係半價，食到飽為止。」