新民黨葉劉淑儀前排po腸鏡照而唔覺意自揭身份證號碼，結果俾人笑到𠵱家，估唔到日前去做身體檢查嘅自由黨田北俊，又學葉劉貼腸鏡X光照，仲擺到明揶揄同抽葉劉水。話說田少噚日喺fb貼咗自己瞓病床嘅相，同埋一張打滿格仔、唔知係乜嘢嘅X光片，跟住就留言話佢個fb專頁管理員田毛毛真係幾「小心」，明明叫佢將腸鏡照上嘅個人資料打格仔就算，點知田毛毛連條腸都打埋。不過田少好寬容咁話「算啦」，反正佢唔係要「攞條腸去選特首」，擺明寸葉劉。