內地地產代理行Q房網自半年前進軍香港市場，一直出高價搶舖搶人，積極擴軍，可惜遇上樓市氣氛轉差，佢哋都要變陣，加開分行要審慎些少。
Q房網香港董事總經理陳坤興指，由6月正式開張至今，已經租落48間分行，其中36間已開業。公司有一半收入來自二手市場，近期二手氣氛唔係咁好，成交量萎縮，都好影響公司嘅擴充速度咁話。
佢哋之前定下目標，今年要開70間分行，𠵱家都改口話要睇市況去做，唔可以盲目擴充，接近大型屋苑嘅地點先會開舖，太貴租嘅亦唔會去租，好似近期新租落元朗與薄扶林兩個舖位，租金比市價約低一成先至拍板。
的確，樓市唔掂，代理更加搏命爭生意，好似呢排就快有新盤推出，有大型地理行就勒令未來兩星期唔准主區前線放假，全力谷開單！