今季新股巨無霸華融資產管理（2799）其中一個基礎投資者係英皇集團主席楊受成，認購最少1億美金，噚日公司舉行投資者推介會，楊受成冇現身，由女兒、即係英皇證券（717）董事總經理楊玳詩（Daisy）代表出席，Daisy一貫咁高貴，手上隻鑽戒顯貴氣。
華融係最大國有不良資產管理公司，英皇證券做金融，Daisy幫手推銷，話「我爸爸對華融好有信心」，相信以後同華融有好多合作空間。至於點樣合作？Daisy欲言又止，話將會係「全方位合作」，唔單止係證券部門。
佢爆料話，楊受成本身跟華融董事長賴小民關係好好，以往未試過有生意合作，今次算係頭一次。而楊受成本人同集團將會繼續物色有潛質嘅股份投資，行業不限㖭呀。