Angelababy「驗臉」引來網民關注，究竟間醫院，個醫生信唔信得過?本報設嘅投票，截至夜晚9點半，有40%讀者話睇完報告都唔會信，咁專家又點睇呢?
從事美容行業50年嘅鄭明明昨日接受《蘋果》訪問，佢話自己憑經驗，用肉眼已可以分辦一個人有冇整容：「整鼻整下巴最普遍，雙眼皮都會肉眼睇到，如果要摸，同臉部其他肌肉質地唔同。」
明明姐表示有留意Angelababy鑑證新聞，佢大讚Baby係天生麗質：「以我肉眼睇，佢冇整容，我有留意媒體拎返佢咁多年相出嚟比較，我覺得佢係越大越靚女，女大18變，箍牙唔係整容，人紅咗，眼有光彩，行緊運，樣樣都會靚啲，現在好多女仔都識化妝。」
提到Baby曾箍牙，會否影響儀容，明明姐表示；「口係唔可以整，咀要日日講野，我做美容，會同好多整容界醫生交流傾偈，同埋有出席過韓國整容活動，嘴係做唔到。」
對於整容定義，明明姐同唔少醫學美容醫生觀點相同：「係美容界，我哋都覺得開刀，麻醉做手術先係整容，用針打botox好普遍，都唔覺得係整容，我哋美容師唔做得，係醫生先做得。」
明明姐就話未聽過國內鑑證呢樣檢查：「未聽過，都係第一次聽，呢方面唔作評論。」