禮拜日沙田九草兩泥賽事，草地用最狹窄之C加3跑道作賽，睇番最近9月19日同一移欄八場草地賽事，放頭入直路嘅馬交出三勝兩位逾半上名，其中「齊飛」、「會心微笑」及「超凡夢想」都係擺前帶到贏馬，不過當日尾段場次卻有「華恩庭」、「飛廉之子」及「競技英雄」後上建功，所以提防壓地後形勢會逆轉。
今戰列陣馬中，二場「齊飛」及「會心微笑」正是於9月19日在田C加3欄贏馬，齊齊抽得好檔起步，有機會再次放到。另外，尾場「星夢」兩次角逐C加3欄1400米都非冠即亞，快馬排埋一檔可食尾糊。
至於泥地方面，馬會曾於周二進行翻土工程，預期場地狀況與上周日賽事相同，當日兩匹泥地頭馬「永得米」及「頌友」都係放頭贏，所以八場「霸氣」及九場「海紅寶」等擅跑泥地之快馬可以優先留意。