早排忙住發佈新手機，未有跟國家主席習近平訪美嘅小米創辦人雷軍，最終都飛咗去美國，事關佢要到紐約聯合國總部，接受亞洲協會（Asia Society）所頒發的「2015年亞洲創變者獎」，是今年唯一獲獎嘅中國企業家，認真威威。
亞洲協會話，雷軍小米手機借助時間紅利及網上營銷，喺中國銷量已高過蘋果，更只係用咗五年，就已被認為係全球最有價值創業公司之一。
獎項由恒隆（101）主席兼亞洲協會副主席陳啟宗頒發，更有另一層意義，事關有消息指，陳啟宗嘅私人家族基金晨興集團，其實早前有份入股投資小米，小米喺香港零售店「小米之家」，亦係恒隆旗下嘅荷里活商業中心，實行有錢出錢，有力出力。小米估值越嚟越高，陳啟宗當然開心，但唔知頒獎前，佢有冇同大會利申頒畀自己友？