雷神今晚開局順利，頭場即為告達理馬房的未勝馬「齊齊歡欣」開齋，到第二場五班一哩，佢繼續騎「甜哥兒」而放棄由自己連輸兩場之「大寶庫」，點知個天唔幫佢，「大寶庫」在郭能胯下沿途前置放頭走甩，末段雖受「甜哥兒」後上嚴重挑戰，但「大寶庫」早着先鞭之下，仍能夠影相以一馬鼻位之先險勝，六歲馬來港三季跑到第17仗，終於以8.5倍開齋，鞍上人亦告打破兩個賽日不勝困局。不過「大寶庫」馬主鄭家純冇到場，由「綠草如欣」馬主孫頌欣拉頭馬。
反觀雷神，過終點後似乎以為「甜哥兒」影贏，知道真正賽果後，有點難以置信發呆，唔可以連同「齊齊歡欣」包辦第一口孖寶，馬主蕭劍平亦無緣打開今季勝門。
今場係熱門天下，事關三、四名「跑贏大市」及「野外桃源」都係有飛馬，四重彩有五千幾蚊派，其中無綫藝人《愛·回家》男主角之一的張振朗，特意入場支持姚君偉愛駒「跑贏大市」，不過還是輸半身位，張振朗拉頭馬夢碎。而大熱門「公証揚聖」更唔見影，勝後再跑谷草一哩走晒樣，與排檔大幅外移沿途蝕位有幾大關係。