前季香港馬王「威爾頓」，係五項一級賽盟主，亦係唯一曾兩次擊敗現任馬王「步步友」嘅馬，可惜佢5月嗰陣一對前蹄受傷做手術，消失咗一排冇操練，有線18台賽馬節目主持，晨操專家積奇就指出：「『威爾頓』至今只係做咗四課工夫，未有試過大閘、未有拍跳，神態力度都好普通，相信都有待操練！」本來練馬師大摩希望隻馬本月25日賽事復出，不過家陣已經告吹，暫定11月下旬先跑得。
其實本港現役名駒之中，「威爾頓」嘅健康狀況已唔算惡劣，上季贏得香港經典盃一級賽嘅「酷男」，本來前途無限，但5月一役大敗之後，一直缺陣至今，原來隻馬右前腳有碎骨，兼且啲骨骼出現大範圍退化現象，想復出恐怕有排等呀！
不過「酷男」就算健康遇挫折，都總叫威過吖，真正消失的名駒，可能係「銀豐神駒」，佢係2013年法國莊柏德大賽亞軍，級數極高，點知來港服役之後，因為傷患，足足兩年幾，至今一次都冇跑過，只係偶然喺晨課出現，所以好多馬迷，根本唔知有佢嘅存在，期間馬主白畀養馬費超過100萬，呢條數認真襟計咯！