來自南非之騎師霍勵賢今季挾盛名再戰香江，九月頭初跑谷草即贏「愛寶」開齋，可惜有頭威冇尾陣，之後一個月逢跑例輸未再捷，成為戰績最曳過江龍，當事人深知自己受批評，早排專登走去大埔海邊減壓，卒之今晚畀佢轉運，於谷草重響勝鼓。
第四場四班1800米，霍勵賢再騎鄉里霍利時馬房之「搖錢樹」，半條直路後上如入無人之境，衝贏攝住內欄上一步不蝕之蘇廐馬「勝風」，以短距離之先，爆出7.7倍半冷win，雙霍南非組合季內首度攜手贏馬，當中霍利時係今季首勝谷草。不過霍勵賢今場有打茅波之嫌，直路從外側不斷閃入，壓向潘頓之6.6倍熱門之一「捷捷勝」，令潘頓須大力勒避，後駒因此只跑第六，剛好無獎金。不過對「搖錢樹」馬主幟哥黃永幟來說，撞碰事件唔關佢事，賽後當然開開心心拉頭馬。
郭能之「勝風」24倍爆唔成只得第二，七歲馬轉倉後初次上名，人馬表現算有交代；第三名由雷神夥拍「勝利威」取得，當事人跑完上半場獨取一冠一亞兩季，又喺騎師王透出領前，第四名係田泰安座騎「幸運新寶」，四重彩派近六萬七千蚊。
霍利時指「搖錢樹」馬性溫馴，很容易訓練，是他喜歡的馬匹之一，今仗增程跑1800米更合。他並謂此馬沙田、快活谷均宜，不過快活谷對手普遍比較弱，較易偷襲。