中國特產茅台酒打算進軍俄羅斯市場，莫非要向俄羅斯嘅「國酒」伏特加宣戰？原來，因為習總近年大力打貪打得好嚴，所以中國國內對奢侈品需求下降，「畀有錢人飲」嘅茅台酒就好自然受影響。點知，貴州茅台董事長就忽發奇想，諗起中國同俄羅斯嘅飲酒文化好相似，於是就想出進軍俄羅斯市場呢一着。
唔好以為茅台酒吸引唔到外國人，俄羅斯總統普京都親身試過茅台，重讚好㖭。不過，最慘係遇上俄羅斯經濟同樣低迷，包括伏特加在內嘅烈酒銷售量，今年頭8個月已經跌咗6.4%。甚至連俄羅斯嘅「國酒」都賣得唔好，咁茅台點算呢？
但有市場研究員就話，因為芧台係俾有錢人飲，所以無論幾時入市，都唔會對當地市場造成衝擊；瑞信就話俄羅斯有大約9.2萬個富豪，茅台攻俄未必冇出路咁話喎。