當有冇問候受傷嘅教授，都成為大學副校長遴選標準，就知道要成為管理層要幾咁照顧下屬感受，當一個師奶喺茶餐廳打囝囝手板幾吓，都會被告虐兒，就知道𠵱家行家長式管教已經行唔過，高路普呢種同球員打成一片作風，真係啱晒利物浦。
當高路普正式執教利物浦一刻，各大社交平台已經出現大大小小有關高帥片段，最令小弟印象難忘就係今年五月德甲煞科戰對雲達不來梅，多蒙特主場球迷、球員歡送高帥片段（ https://www.youtube.com/watch?v=BRVKaVJz5ks ），坦白講，上季多蒙特兼顧歐聯，搞到長期位於榜尾，最後階段先回勇上返中游，最終排第七，以佢哋人腳班底已經有晒交代，但高帥一樣孭鑊走人，難怪職球員同球迷咁唔捨得；同皇馬靜靜雞送走前隊長卡斯拿斯、前領隊安察洛堤，真係差天共地。
講真利物浦呢幾季唔算有咩特別大成就，要sell都係之前嘅光輝，另外就係人情味。羅渣士（圖）原本出身寒微，帶史雲斯有成就之後去紅軍，原本都幾啱利物浦㗎，但一登龍門就搞小三，正所謂糟糠之妻不可棄，真係自找麻煩。
高路普假假哋都拎過德甲冠軍、歐聯亞軍，球壇地位都唔細，不過初嚟報到都行下把位，記者會上先講自己英文唔好，而且努力學緊，希望記者大哥們包涵，已經贏到印象分，而且家庭美滿，有老婆有仔有狗，成功男士典範，唔敢講有冇盃捧，但肯定好過羅渣士先。
文：牽牛