獅子王來短訊叫左丁山睇一段蘋果動新聞，講一位36歲懷孕媽咪在九龍城翠華茶餐廳打兩歲兒子幾下手板，竟有男食客投訴佢虐兒。雙方初而口角，男食客繼而報警，警察趕至竟然冇common sense，公事公辦，帶媽咪到警署落案，以5000元保釋外出，兩歲仔則送往醫院急症室驗傷，擾攘八九小時之後，警方卒之話事件不涉及刑事成份，銷案了事。
獅子王慨嘆呢個社會有病，左丁山同佢講：「或者只係一啲人有病啫。」社會上的確不時有虐傭、虐兒事件發生，令人心痛。在大庭廣眾打兒子手板，搞到細路大聲喊，又係騷擾他人嘅，父母不應如此，最多只能好言相勸，扭計嬰孩返到屋企先至教訓佢；但若有此等事發生而其他人要去報警拉人，男食客之類未免多餘兼多事，用陶傑術語講，中咗「左膠毒」！
問沙田陳太有冇打過兩歲幾大嘅孫女手板，佢話：「曳咪打幾下囉。孫女有時發脾氣，大聲吵鬧，擲玩具落地，我都會捉住佢打手仔兼拖佢入房教訓一輪，唔好以為細路唔識嘢，久而久之，小孫女知道有啲事係唔可以亂嚟嘅！」左丁山笑佢：「唔該你睇吓十月十日嘅蘋果動新聞，告你虐兒㗎。」陳太話：「唓，我個女夠不時打佢個女嘅手板啦！」
以前打仔打女視作等閒，左丁山就吃過不知幾多藤條炆豬肉，中學校長揸住又長又大嘅間尺巡課室，隨時打學生手板，又曾被小學英文老師敲打手背痛到飛起。不知從那時開始，香港不准體罰兒童，阿媽打仔會被送官府去，老師體罰學生會失去飯碗，好似係文明進步咗，但時至今日，似乎有啲矯枉過正，不少人及家長愛護子女到不講理程度，尤其是名校學生最受家長庇護。問吓不少中學老師，佢地都大嘆最難頂就係聽家長投訴教師懲罰佢地子女嘅電話。一間小學每年有近千人排隊叩門申請入學，家長爭相參加入學講座，對老師甚為恭敬，到兒子被取錄入學嘞，上堂一兩個月之後，家長就鍾意打電話鬧老師：「做乜要我個仔留堂，你有冇證人指證我個仔犯規，我不能信你一面之詞！」又會投訴個仔踢足球被同學撞傷腳，要求校方懲罰撞人嘅球員（同學仔）諸如此類，不一而足，相信呢啲家長一定唔會在家打兒子手板。咁愛護兒子嘅家長千祈唔好送兒子到英國寄宿學校，否則在足球或欖球場上俾同學撞到飛起，阿媽走過去英國報警乎？咁受保護嘅兒子他日出到社會做事，實會缺乏競爭力，失敗收場。