高路普（圖）做利物浦領隊，唔少紅軍球迷都燒晒炮仗慶祝，因為終於送走羅渣士，仲請到一個咁激情、咁有熱血嘅高路普。真係，小弟聽到高路普呢個名，都覺得熱血沸騰！
唔講戰術，小弟覺得高路普有樣嘢遠勝羅渣士，同埋係𠵱家利物浦必須嘅，就係威望。最近兩季，利物浦都有戰術核心離隊，先有蘇亞雷斯，後有史達寧，羅渣士對上兩季嘅戰術都係分別圍繞佢兩個嚟踢，都踢得有板有眼。
不過，紅軍留唔住人才，畀佢哋走咗。換完一次核心，又換一次，利物浦越嚟越差真係難免。你估個個領隊都好似雲格咁有料咩，以前年年賣隊長都維持到一樣成績！
羅渣士教紅軍前係教史雲斯，冇拎過重要冠軍，但高路普唔同，佢試過喺德甲挑戰拜仁慕尼黑嘅壟斷，贏過冠軍，又入過歐聯決賽，呢份資歷有助利物浦留低踢得好嘅球員。幻想吓，你係一個有離心嘅利物浦球員，領隊要勸你留隊，話嚟緊幾年一定有冠軍，叫你畀啲耐性，你覺得羅渣士定高路普講得有說服力？盛傳菲臘比古天奴得巴塞隆拿青睞，𠵱家高路普要做嘅，係要用佢嘅魅力留住隊中最好嘅人才。
另外，高路普嚟咗利物浦後，小弟覺得最慘嘅係占士米拿。佢今季以自由身加盟紅軍，佢話前領隊羅渣士承諾，佢唔單止有正選，仲可以打到佢最想踢嘅中路位置，踢一個偏重進攻多嘅中場。不過，新人事、新作風，高路普會唔會重用占士米拿呢種英式中場，真係成疑問。
文：咖喱