八方噚日報道，自由黨榮譽主席田北俊喺fb貼文，反擊《星島日報》齊秀峰專欄「建制擁躉噓爆自由黨」，暗指文中「政界高人」係金鐘仁、即新聞統籌專員馮煒光。
「點解唔夠膽開名」
點知《星島日報》噚日再出文還擊，話高人並非金鐘仁，完全係唔同級數，叫田少咪低估影響自己政治判斷，點知田少即日再喺fb挑機，叫個高人夠膽就開名！
田少仲用英超車路士同阿仙奴做比喻，話車路士知阿仙奴嘅球迷噓爆佢哋，「你估車路士會care咩？」，明顯寸噓爆自由黨嘅建制擁躉，根本唔係支持自由黨嘅人，佢一啲都唔care！至於話高人唔係金鐘仁，田少話唔係佢，咪即係「超然嗰個」，即係CY喇，之後佢繼續紮馬挑機，反問呢位高人「點解唔夠膽開名？」