人稱「大輝法師」嘅工業界立法會議員林大輝向來金句連連，曾以「本來無僭建，何處惹塵埃，因果循環，報應不爽」寸爆有僭建嘅梁振英，即時聲名大噪，走直選之路高唱入雲，噚日仲為喺各區出戰擺咗唔同pose，口說隨緣，但身體好誠實，尤其被認定有勝算嘅新界東，佢個pose係「胸有成竹」，各方人士睇路嘞。
五大造型迎戰直選
本身循工業界功能組別晉身立法會嘅大師，議席盛傳由廠商會副會長吳永嘉取代，若然想繼續留守立法會，就要改循地區直選。佢噚日話自從政改方案被否決，對於係咪繼續做議員一切隨緣，但邊說看破紅塵，另一邊就為參選各地區直選擺出唔同造型。
佢先喺新界東蹺起雙手，如補習天王般「胸有成竹」，新界西就豎起勝利手勢「志在必得」；九龍東則手握拳頭，寓意「一定得」；九龍西則垂下雙手，意即「唾手可得」；港島就豎起拇指，叫做「有實力」，總之區區都變成一個馬名，暗示區區跑得出。
但一講到特首選舉，佢就擺出兩隻拇指向下嘅姿勢，到底係唔滿意個制度、抑或不滿𠵱家嘅特首人選？大家心中有數。而擅長評論CY嘅佢噚日「大讚」對方有三大「優點」，包括語文能力極佳，係年輕人學習對象；二係好老闆，無論局長如何出錯或民望極低，力保唔炒；三就係支持漁農業發展，仲玩埋家居種植，唔通暗示漁農界係堅實票倉？但佢表明，CY毋須再多做5年特首。明讚暗彈，果然係高手。
李八方
mailto:[email protected]