喺上市公司嘅企業管治字典裏面，獨立非執董（獨董）扮演重要角色，主要為董事會提供客觀意見，以保障小股東利益。上月中，金管局總裁陳德霖（Norman），喺財資市場公會峯會上，都提過要強化獨董功能，估唔到話咁快佢就即刻做嘢，聽聞佢今日會應銀行學會邀請，聯袂率領18位上市公司獨董訪京。
同行嘅據講包括證監會前主席方正，仲有喺香港H股上市嘅四大國有銀行部份獨董，金管局副總裁阮國恒亦會陪同出訪。
陳總率領銀行家訪京，每年銀行公會都會舉辦一次，跟銀行學會攜手訪京，以往亦試過，不過聽聞以獨董呢個名堂掛帥交流，就係第一次。
今次訪京行程，主要集中喺周四、周五兩日舉行不同嘅會議，一連兩天拜會嘅機構當然包括中國銀監會。呢次訪問目的，聽聞係宏觀交流，畀啲銀行獨董，可以更深入了解內地未來發展方向，同埋內銀業嘅發展面貌，例如領導人成日掛喺口邊嘅一帶一路、中港跨境業務等。