一個人喺外地蕩失路真係巧驚驚㗎！噚日台灣有單新聞，話有個香港人去台北旅行，原本要去信義區嘅101摩天大樓，但同朋友喺捷運上失散，啲證件同錢畀朋友袋住，又唔識國語，問路仲俾人指咗去一間叫「101文具天堂」嘅文具店，結果一個人行咗兩日一夜，先俾人送去警局搵番導遊同朋友。
店員：間唔中都有
呢個港人男子姓高，31歲，之所以去到警局，因為佢餓得滯去便利店買嘢食但冇錢畀。都話台灣人情味濃，警察見佢咁肚餓就攞嘢畀佢食，佢即刻跪低多謝對方，嗰個警察即刻扶起佢，相當緊張，仲擔心佢冷親，幫佢披件外套。
有台灣記者特登去「101文具天堂」問吓情況，店員竟然話其實間唔中都會發生去101變去101文具天堂嘅事件，見怪不怪。總之，大家去旅行記住錢同證件都要跟身！